МАТКА - АЛПИНИСТИЧКИ СОБИР И МЕМОРИЈАЛ

Од денес, Петок, до Недела (7 до 9 Мај) на Матка ќе се одржи традиционалниот алпинистички собир - меморијал кој е посветен на алпинистите Васил Франговски - Франго и Димитар Илиевски - Мурато.

Работните содржини на собирот ќе се одвиваат според програмата што беше предвидена да се реализира на минатиот (одложениот) собир на Плоча. Главно ќе се работат наставни содржини според програмата од минатиот собир. Кандидатите за називите Алпинист и Инструктор по Алпинизам ќе работат како инструктори и демонстратори со почетниците.

Покрај наставните содржини, за попладневните часови е предвидено качување во алпинистичките насоки.

Дополнителни информации може да се добијат во Македонската алпинистичка асоцијација.

 

7 Мај 2010 година

Костантин Циривири,
Претседател на
Македонската Алпинистичка Асоцијација

Алпинистичка балканијада Враца 30. 04. – 02. 05 2010 година.

Во период од 30. 04. До 02. 05 2010 година во Бугариja на локалитетот Враца се одржа Алпинијада во организација на бугарската федерација по алпинизам и алпинистичкиот клуб „Вратица“ од Враца. На оваа алпинијада учество земаа Зоран Мајсторски од АК „ Плоча“  од Радовиш и Никола Андоновски од АК „ Матка “ од Скопје.
Официјалното собирање и тргнување кон Бугарија беше од Струмица каде што на 30.04 нокта во 03 часот заминавме за Бугарија со автобус. На границата имавме малку проблеми околу некои детали што не ги размисливме претходно, но благодарение на добрите граничари бевме пуштени.
Во Софија пристигнавме во 09 часот сабјлето и веднаш продолживме за Враца. По пристигнувањето ги завршивме работите околу пријавување во полиција и веднаш отидовме до алпинистичкиот дом каде што беше главното собиралиште на алпинистите.
По поставување на шаторот веднаш заминавме на западната карпа со план да ја качуваме насоката на централниот гребен, но кога ја видовме линијата на ‘‘Безенги‘‘, го сменивме првичниот план и решивме да ја  качувавме насоката ‘‘Безенги‘‘. Во оваа насока имаше 3 наврски од Србија кои набрзо ги престигнавме. Шесте должини во насоката ги поминавме без никакви проблеми и наместо да абзелуваме ние слеговме пешачејки по челичната сајла кое не е баш фективно во поглед на потребното време. По слегувањето од насоката, имавме уште два часа до стемнување и отидовме на карпата на ‘‘Забот‘‘ каде што ја качивме насоката ‘‘Кучешки заб‘‘ на која направивме една наша првенствена варијанта која ни одзема доста сила и време бидејки беше прилично тешка со многу мали можности за обезбедување.
Први Мај беше посветен на празникот и за тоа решивме наша насока да биде ‘‘Втори Конгрес‘‘ на централната стена, насоката е долга 370 метри со различни тежини почнувајки од IV + до VII+. Овде веќе имаше две наврски од Бугарија што качуваа и беа многу бучни,  т.е. за цело време се шегуваа што и нам ни беше забавно. Качувавме јаже по јаже заедно со Бугарите и напредувавме релативно брзо, и покрај тоа што понекогаш мораше да ги чекаме. Последната должина беше жлеб во една црвена плоча и во него тежината беше прилично голема. Бугарите први го качуваа овој дел но на средината од жлебот ја потрошија целата опрема што ја имаа па според философијата на ‘‘братството на јажето‘‘ им ја дадовме нашата опрема што после ни послужи и на нам. По искачувањето слеговме по патеката а потоа по челичната сајла и по издробениот сипар кој го поминавме во трчење.
Втори мај беше посветен за западната стена каде ја качивме насоката „ Дилфер “  која ни ја препорача лично Петко Тотев. Првично сакавме да качуваме друга насока, но кога видовме дека таму има голема гужва од алпинисти, се одлучивме за ‘‘Дилфер‘‘ и покрај тоа што оваа насока беше доста потешка од првично планираната. Зборовите на Петко „ Ваздушно катерење “ ме инспирираа и пред се сакав да увидам какво е тоа воздушно катерење, иако беше тешко сепак беше многу добро качување со што сум му благодарен за тоа што ми го понуди.
По слегувањето од насоката отидовме на локалитетот ‘‘Урвич‘‘ каде што ја качивме истоимената насока која навидум изгледаше како легната, но жлебот на почетокот на насоката беше прилично тежок и незгоден. Сепак, за кратко време ја качивме и оваа насока која изобилуваше со прецизно качување. Слегувањето ни беше со абзел.
По слегувањето од карпите се подготвуваме за вракање кон Македонија, од Враца до Софија со воз, а од Софија за Скопје со автобус, со многу чекања по станиците.
Неколку збора за овој локалитет: го препорачувам на секој кој што сака да качува и да ужива бидејки долниот сектор од локалитетот како и  ‘‘Западната стена‘‘, ‘‘Забот‘‘, ‘‘Урвич‘‘, ‘‘Софија‘‘ и другите помали и поголеми сектори претежно се уредени со  лепени клинови и и по некој експансионен. Овој дел од локалитетот е уреден по сите светски стандарди. Ниската надморската височина е таа што е најголем непријател во летните денови, па затоа локалитетот е најдобар за качување во пролет и есен. Насоките се со различни тежини но со ‘‘бугарско класирање и оценување‘‘  (сакам да споменам дека ако кај нас нешто е оценето со  VI кај нив, на оваа стена би било V дури и помалку) и затоа немојте да се залетувате во потешките насоки. Исто така треба да се знае дека на оваа карпа нема ништо лесно.  За повеке информации и помош стојам на располагање.

4.05.2010
Зоран Мајсторски

 

24 и 25 АПРИЛ, АЛПИНИСТИЧКИ СОБИР НА МАТКА - Семинар за напредната група алпинисти

За време на минатиот викенд се одржа најавениот алпинистички собир на Матка кој беше наменет само за напредната алпинистичка група од Македонската алпинистичка асоцијација. Главната работна тема беше качување по избор, како и изработка на фото и видео материјал за време на алпинистички искачувања.

Во продолжение следува преглед на реализираните активности.

Сабота, 24. IV. 2010 год.
Преглед на искачени насоки:
Панде Фармаков, Никола Андоноски: „Новогодишен“, две искачувања;
Никола Андоноски – Панде Фармаков: „Матка – лева варијанта“;
Крунослав Аџиевски – Илија Циривири: „Отмар“;

По овие искачувањеа групата се упати кон Планинарскиот Дом „Матка“, заради учество на трибината за планински туризам.

После состанокот беше реализирано по уште едно искачување:
Никола Андоноски, Бобан Стојанов: „Новогодишен“;

 

Недела, 25. IV. 2010 год.
Преглед на искачени насоки:
Никола Андоноски, Димитри Димитров, Бобан Стојанов: „Новогодишен“
Антонио Додевски – Димитри Димитров – Борис Арнаудов: „Отмар“
Бобан Стојанов – Никола Андоноски – Крунослав Аџиевски: „Циго“

Наврската Антонио Додевски – Димитри Димитров – Борис Арнаудов планираа да качуваат во насоката „Матка – лева“, но при пристигнувањето во подножјето на карпата веќе друга наврска (качувачи кои не беа дел од собирот) се подготвуваше да качува во „Матка – лева“.

Првичниот план беше да се направат искачувања во „Матка – лева“ и „Циго“ и да правиме видео снимки, заради близината на овие две насоки. Но поради тоа што друга наврска веќе влегуваше во „Матка – лева“, наврската Антонио Додевски – Димитри Димитров – Борис Арнаудов се одлучи да качува во насоката „Отмар“.

Поради пролетниот период и затоплувањето, но и заради обилните врнежи и обраснатоста на насоката, при качувањето имаше неколку мали одрони, најмногу во насоката „Отмар“.

26. 04. 2010
Никола Андоноски

 

ПОМЕСТУВАЊЕ НА АЛПИНИСТИЧКИОТ СОБИР НА ПЛОЧА

Заради лошата временска прогноза за наредниот викенд, алпинистичкиот собир кој беше планиран да се одржи на Плоча се пренасочува за  во Матка, со тоа што тој ќе биде наменет само за припадниците на напредната група од алпинистичкото училиште на Македонската Алпинистичка Асоцијација.

Сите работни содржини кои требаше да се изработат во рамките на училиштето со почетничката група се поместуваат за првиот нареден собир кој ќе се одржи на Матка во деновите 8 и 9 Мај 2010 година, во рамките на традиционалниот меморијален алпинистички собир.

Активностите на напредната група за време на престојниот викенд ќе бидат адаптирани според условите во локалитетот Матка.
Преместувањето на активностите на оваа алпинистичка група се прави заради приклучување кон акцијата за обележување на денот на македонските планинари што ќе се одржи на 24 Април 2010 година во која алпинистите ќе бидат активно вклучени.

23.04.2010 година.

Костантин Циривири,
Претседател на
Македонската Алпинистичка Асоцијација

 

Алпинистички собир 24 и 25 Април 2010 година

Наредниот алпинистички собир ќе се одржи за време на престојниот викенд, 24 и 25 Април 2010 година.
Местото на одржување на собирот ќе биде алпинистичкиот локалитет Плоча.

На собирот ќе се одвиваат активности во две различни групи кои ќе работат според утврдена програма.
Едната група се почетниците во алпинизмот (кандидати за курсисти и помлади алпинисти), а втората група се напредните алпинисти.

Работата со почетниците ќе биде насочена кон продолжување на активностите кои беа започнати за време на минатиот собир и кои заради природата на материјата, неопходно е да бидат завршени во што е можно пократок временски рок (сидришта, осигурување, падови, извлекување, абзелување, користење помошни средства за самоизвлекување...). Покрај тоа, припадниците на оваа група ќе качуваат и во подолги насоки, како дел од заедничката програма со напредните алпинисти.

Напредната група ќе работи на наредната етапа од подготвителната фаза во својата програма, при што акцентот ќе биде ставен на обемот и квалитетот на ситуациониот алпинистички тренинг, т.е. должината и тежината на искачените насоки. Со оглед на тоа што насоките во овој локалитет се одлично опремени со осигурување ‘‘ин ситу‘‘, како и заради можноста да се организира брз и едноставен трансфер од врвот до подножјето на карпата, локалитетот Плоча најмногу одговара за оваа етапа од подготовките со напредната група.

Во Сабота навечер и во Недела попладне ќе бидат организирани теоретски предавања. Покрај тоа ќе бидат организирани проекции на филмови и фотографии, како и дискусии на одредени теми.

Сместувањето ќе биде во алпинистичкиот дом Плоча, каде што и ќе се изведуваат теоретските предавања.

Наставните активности за почетничката група ќе се изведуваат според следнава програма:

Сабота
10 - 11 Повторување за сидришта, осигурување, извлекување...
11 - 16 Качување (кратки насоки + една долга насока);
16 - 18 Абзелување, самоизвлекување и минување низ детали со помош на регуларна опрема (замки, гуртни);
19.30 - Предавање: Алпинистичка опрема, 1 час (Ристе Калинов);
20.30 - Предавање: Рељефни форми на карпа, техники на качување и симболи за опис, 1 час, (Зоки Мајсторски);
21.30: - Проекции на филмови и дискусии.

 

Недела
9 - 11 Сидришта, осигурување, задржување пад, абзелување, извлекување...
11 - 14 Качување
14,00 - Предавање: Подготовка за алпинистичко искачување (тура), 1 час (Костантин Циривири);
15,00 - Предавање: Уредување на алпинистичките локалитети и етика на качувањето во нив, 1 час (Боби Стојанов);

Работните активности за напредната група и во двата дена ќе се изведуваат според програма која предвидува качување алпинистички насоки со вкупна должина од 1000 метри на ден, со тоа што најмалку една насока треба да биде качена во наврска со почетник и уште една насока да биде качена во ноќни услови.

Во случај на прогноза за континуирани врнежи за време на целиот викенд, програмата за почетната група од алпинистичкото училиште ќе биде поместена за наредниот собир. Евентуалното поместување на работата со оваа група ќе биде објавено на страната на МАА а ќе бидат пратени и дописи до алпинистичките клубови.

Дополнителни информации може да се добијат на меил адресата на Македонската Алпинистичка Асоцијација, како и во канцеларијата на ФПСМ, секој ден од 13 - 15 часот.

 

19.04.2010 година

Македонска Алпинистичка Асоцијација
Претседател: Костантин Циривири

 

КОНКУРС ЗА УЧЕСТВО ВО АЛПИНИСТИЧКА АКЦИЈА ВО ВРАЦА, Р. БУГАРИЈА

За време на првомајските празници во алпинистичкиот локалитет Враца во соседна Република Бугарија ќе се одржи традиционалната алпинијада на бугарските алпинисти, за време на која што речиси секогаш учествуваат и алпинисти од други земји.

Со оглед на тоа што овој локалитет според квалитетот на карпата, должината на насоките и нивната среденост, нуди одлични услови за качување, македонските алпинисти честопати организираат алпинистички посети во Враца.
Можноста за дружење и размена на информации и искуства со алпинистите од други земји преставува дополнителна причина за учество на собирот.

Македонската алпинистичка асоцијација ќе земе учество на собирот, при што би била испратена екипа составена од искусни алпинисти и алпинисти кои се дел од напредната група на алпинистичкото училиште на МАА.
МАА ќе ги покрие трошоците за превоз за секој учесник.

Право на конкурирање имаат сите алпинисти членови на МАА кои редовно учествуваат на алпинистичките собири и кои се способни да качуваат како први во насоки со тежина V по скалата на UIAA, со поставување сопствено осигурување.

Пријавите да се доставуваат на e - mail адресата на Македонската алпинистичка асоцијација (macedonian_alpine_club@yahoo.com). Краен рок за пријавување е 28.04.2010 година.

Дополнителни информации може да се добијат на меилот на МАА и канцеларијата на ФПСМ, секој ден од 13 до 15 часот.

 

15.04.2010 година

Македонска Алпинистичка Асоцијација
Претседател: Костантин Циривири

 

АЛПИНИСТИЧКИ СОБИР НА ПЛОЧА - Успешна реализација на собирот.
12.04.2010

Како што беше најавено, во деновите од минатиот викенд се одржа редовниот алпинистички собир во локалитетот Плоча.

На собирот учествуваа повеќе од триесетина алпинисти од алпинистичките клубови од Скопје, Охрид, Штип, Струмица, Тетово и Радовиш. Најбројни беа алпинистите од АК ‘‘Матка‘‘ од Скопје.

Работата на собирот се одвиваше според утврдената програма. Како што беше и предвидено учесниците беа поделени во три категории: почетници кои беа под инструктажа на Зоки (Мајсторски) и Боби (Стојанов) со асистенција од Никола (Гостиварец), напредни алпинисти и напредни кои качуваа насоки со почетници.

Од наставните содржини беше изработено се што беше планирано. Раководителите на работните групи Зоки и Боби констатираа дека новите содржини, посебно тие како изработката на сидриштата и постапките во случај на пад на партнерот, кои се од огромна важност за безбедноста во карпа на идните алпинисти, беа изработени одлично и со висок степен на усвојување на знаењето од страна на курсистите.

За време на собирот свое алпинистичко крштевање - качување во алпинистичка насока, добија сите почетници. Некои од нив за прв пат доаѓаат на алпинистички собир. Вкупно беа реализирани 60 искачувања во алпинистички насоки со различна тежина.

Во вечерните часови беа организирани проекции на филмови со алпинистичка содржина.

За време на собирот, во Сабота попладне се одржа состанок на претседателството на МАА каде што беа разгледани повеќе тековни прашања, главно поврзани со организацијата на МАА, процесот на добивање решенија за вршење дејност алпинизам за клубовите, како и планирање на активностите за наредниот период. Беше завземен став првата наредна акција на МАА надвор од Република Македонија да биде учество на алпинијадата во локалитетот Враца, соседна Бугарија. Времетраењето на акцијата и бројот на учесниците ќе бидат дополнително дефинирани и објавени на страната на МАА. Заради немање финансиски средства, се одложуваат акциите планирани за Алпи-те, кои требаше да се реализираат во пролетниот период.

Во текот на наредните денови ќе биде објавен преглед на искачени насоки за секој учесник, а наскоро, со новиот изглед на веб страната на МАА, ќе има постојан евиденциски список на искачувањата на сите алпинисти.

Местото и тематската одржина на наредниот алпинистички собир ќе биде објавен во текот на наредната седмица.

Виктор ‘‘набива километража‘‘

Ико влегува во превисот на ‘‘Два Роберта‘‘

Кој со кого е, после зимската апстиненција вистинска ‘‘инвазија‘‘ на карпата

Лево Горан Аџи помалиот (според алпинистички стаж, инаку постар по години) брат на Круно со Светле

Претседателот (Ристе Калинов, АК Матка) во акција во ‘‘Бозо‘‘.

Светле Трендова во горниот дел на ‘‘Два Роберта‘‘

12.04.2010 година
МАА

АЛПИНИСТИЧКИ СОБИР 09-11 Април, 2010 Година.
08.04.2010

Престојниот викенд од 9 до 11 Април во алпинистичкиот локалитет Плоча ќе се одржи собир на алпинисти.

Право на учество имаат сите алпинисти со обезбедено осигурување од несреќа и кои поседуваат комплетна опрема за искачување во карпа.
На собирот исто така се добредојдени и припадниците на другите спортови во ФПСМ, посебно спортските качувачи и спелеолозите.

За време на собирот задолжително е почитување на нормите за безбедно изведување на алпинистичките искачувања кои можат да се прочитаат во правилникот за работа на МАА како и во официјалните препораки на МАА од минатата година кои беа објавувани на оваа страна.

Ќе се работат следниве работни содржини:

- Качување насоки по избор;

- Работа според утврдена тренинг програма (ова се однесува само за припадниците на напредната група од алпинистичкото училиште на МАА);

- Повторување за изработка на сидришта и осигурување на партнерот при искачување во алпинистички насоки;

- Проекција на филмови и дискусија на одредени теми од областа на алпинизмот;

Сместувањето ќе биде во алпинистичкиот дом ‘‘Плоча‘‘ како и во шатори во околината на домот.

Пожелно е секоја алпинистичка секција да го пријави учеството на своите членови заради подобра организација на сместувањето и работните содржини.

Информација за алпинистичкиот локалитет Плоча може да се добијат на страната на МАА како и на страната на АК ‘‘Плоча‘‘ од Радовиш.

Во случај на лошо време дел од активностите ќе се изведуваат во болдер вежбалната на АК ‘‘Плоча‘‘ во Радовиш.

Напомена: И покрај тоа што локалитетот е опремен главно со "in situ" осигурување со експанзиони клинови, задолжително е носење чекан, клинови и средства за осигурување (како што е напоменато погоре во овој текст).

Дополнителни информации може да се добијат:
070/ 550 058 - Зоки Мајсторски
02/ 3165 540 - МАА (од 13 - 15 часот)

Костантин Циривири,
Претседател на МАА

 

РЕАКЦИЈА - Насока ГАВРАН
05.04.2010

Целиот текст на следниот линк ГАВРАН

_______________________________________________

ЗИМСКИ СЕМИНАР НА ПОПОВА ШАПКА - Успешно реализиран вториот зимски семинар.
01.04.2010

Како што беше најавено, вториот овогодишен семинар за обука од областа на зимските техники и вештини се одржа за време на изминатиот викенд на Попова Шапка, во планинарскиот дом Смрека.

На семинарот учествуваа триесетина (или нешто повеќе) учесници, алпинисти и планинари од повеќе градови во Македонија.

Согласно со предвидената програма беа изведени теоретски предавања и практичен тренинг од следниве тематски области:

- Лавинологија

- Движење во наврска по заснежена падина

- Реализација на ноќна тура во зимски услови

- Изработка на биваци во снег

Сите работни содржини беа успешно реализирани, а покрај работата и развивањето плодни дискусии на различни теми, имаше и дружење помеѓу учесниците, планинари, алпинисти, стари, млади.

По завршувањето на семинарот можеме со задоволство да заклучиме дека ваквиот тип на обуки не само што се неопходно од аспект на едукацијата и кревањето на нивото на квалитетот во планинарството и алпинизмот, туку даваат и огромен придонес за подобра комуникација и градење заедништво помеѓу членовите на ФПСМ.

На барање на учесниците, Македонската алпинистичка асоцијација и Центарот за стручно оспособување при ФПСМ, ќе направат обид во скоро време да се организира уште еден семинар со тематски содржини од заеднички интерес за различните планинарски спортови.

Погледнете дел од фотографиите направени за време на семинарот.

 

Изработка на снежен профил

Александра во изработка на бивакот

Движење во наврска - излегување на гребен


Движење во наврска - спуштање по заснежно било


Комбиниран бивак


Славе од смрека ни дава инструкции за работа


Сондирање


Вториот влез во бивакот


Засолниште од ветер


Движење во наврска - избор на безбедна линија за движење

Костантин Циривири,
Македонска Алпинистичка Асоцијација

 

Известување – Одложување на семинарот на Попова Шапка

Семинарот на Попова Шапка кој требаше да се одржи во деновите од 12 до 14 Март 2010 година, ќе биде одложен за последниот викенд од месец Март (26 - 28 Март).
Семинарот се одложува на барање на клубовите од вантрешноста, кои заради лошите временски прилики што се очекуваат во текот на наредниот викенд, би имале проблеми со превозот.
Попрецизни информации во врска со одржувањето на семинарот во предвидениот датум (26 - 28 Март, 2010 година) ќе бидат објавени во наредниот период.

10.03.2010 година.

 

Костантин Циривири,
Македонска Алпинистичка Асоцијација

ВТОР ЗИМСКИ СЕМИНАР - ПОПОВА ШАПКА, 12 - 14 МАРТ 2010

Во деновите од 12 до 14 Март 2010 година, во организација на Македонската алпинистичка асоцијација и Центарот за стручно оспособување при ФПСМ, на Попова Шапка ќе се одржи вториот семинар за движење и безбедност на планина во зимски услови.

Теоретските предавања ќе се одржуваат во планинарскиот дом Смрека, а практичната работа ќе се изведува во блиската околина.

На семинарот ќе се работат теми од две области:
1 - Лавинологија
2 - Движење по заснежена падина.

Секој учесник во семинарот треба да поседува комплетна зимска опрема и облека. Специјалната опрема за лавинологија (сонди, картички за анализа и сл.) ќе ја обезбедат организаторите на семинарот.

Во текот на наредната седмица ќе биде објавено известување со  преглед и временски распоред на работните содржини.

Дополнителни информации може да се добијат:

- 02/ 3165 540 (Канцеларија на ФПСМ) секој работен ден од 12.00 - 15.00 часот;
- 071/ 369 280 (Костантин Циривири);
- 071/ 342 248 (Антонио Додевски);

 

5.03.2010 година.

 

Костантин Циривири
Македонска Алпинистичка Асоцијација

 

ТРЕНИНГ НА НАПРЕДНАТА ГРУПА АЛПИНИСТИ ОД МАА - ДЕМИР КАПИЈА 19 - 21 ФЕВРУАРИ 2010.

Согласно со одлуката на Македонската алпинистичка асоцијација и стручниот тим на ЦСО при ФПСМ, алпинистичката обука во текот на 2010 година ќе се одвива во две одвоени групи - почетници и напредни алпинисти. Како што беше претходно објаснето, ова е направено со цел да се овозможи подобро функционирање на напредните алпинисти.
Првиот годинашен заеднички тренинг (обука) за оваа година беше реализиран во деновите од 19 до 21 Февруари на Демир Капија.
Работните содржини беа спроведени според воведна програма за качување на сува карпа и истата преставува извесно одстапување во однос на планираните активности за овој период, за кога е предвидено главно да се реализираат качувања во зимски услови во планинските локалитети.
Бројот на учесници, вкупно седум, може да се оцени како задоволителен ако се земе во предвид периодот од годината (испитни сесии) и поклопувањето на собирот со отворањето на изложбата на фотографии на Аце Дончев во Струмица.
Подетални информации за активностите може да се добијат од текстот на Зоки Мјасторски, кој е раководител на напредната алпинистичка група.

Костантин Циривири

Алпинистички собир Демир капија од 19 до 21 февруари

Иако сеуште  календарски сме зима но неколкуте потопли  и посуви денови создадоа услови за качување на сува карпа. За да ги искористиме поволните временски прилики се организиравме група алпинисти од МАА, сите припадници на напредната тренинг група, за тренинг на Демир Капија.
Поради надојденоста на реката Вардар ја користевме патеката која слегува до абзел линијата на насоката Б2. Се поделивме во две двојки и една тројна наврска. Во план беше искачување во насоките  ‘‘Влатчева‘‘ и ‘‘Гавран‘‘.
Во Влатчева качуваа Бобан Стојанов и Горан Самоников (АК Астрајон од Штип)  и Мирослав Ристовски од Тетово (ПК Љуботен) со Панде Фармаков (АК Матка) од Скопје. Зоран Мајсторски (АК Плоча од Радовиш), Жикица Ивановски (АК Астрајон од Штип) и Никола Андоновски (АК Матка Скопје) ја качуваа насоката Гавран. По искачувањето на насоките во попладневните часови се подигна логор покрај реката Вардар. Дел од луѓето спиеја во шатори а дел во бивак на отворено веднаш  под  војничкото вежбалиште.
Една возило со четворица алпинисти замина за Струмица каде што алпинистот и фотограф Александар Дончев (АК Скала од Струмица) ја отвари поставката во Стррумица на изложбата под името  ‘‘Алпи 2009 година‘‘ која претходно беше прикажана низ неколку градови во земјава. Посетителите и критичарите ја оценија изложбата со највисоки оценки, со што Александар уште еднаш  го презентираше македонскиот алпинизам во најдобро светло.
Во неделата качуваше во насоките ‘‘Влатчева‘‘ и ‘‘Тулумба‘‘. ‘‘Тулумба‘‘ ја качија Боби  и Жика, додека Зоки (јас) со Никола ја качуваа ‘‘Влатчева‘‘.
Со искачувањето на овие насоки заврши тренинг собирот.

22 Февруари 2010 година
Зоран Мајсторски

Нова изложба од циклусот "Алпи 2008"

Пред повеке од сто посетители во домот на културата во Стримица беше отворена изложбата “Алпи 2008 година” од нашиот колега алпинист и фотограф Александар Дончев. Воедно ова беше и промовирање на Алпинистичкиот клуб Скала од Струмица.

Оваа изложба која има патувачки карактер, посети повеке градови во Македонија и во вистинско светло го презентираше македонскиот алпинизам, а за сето тоа зборуваат фотографиите.

 

 

ЗИМСКИ СЕМИНАР ЗА АЛПИНИЗАМ - ПОПОВА ШАПКА, 12 - 14 ФЕВРУАРИ 2010 ГОДИНА.

Со извесно пролонгирање заради реалното доцнење на зимата, за време на престојниот викенд ќе се одржи првиот семинар од алпинистичкото училиште на Македонската алпинистичка асоцијација што се организира во соработка со Центарот за стручно оспособување при ФПСМ.

Како што е вообичаено за сите семинари во овој период од годината, тематските содржини ќе бидат од областа на зимскиот алпинизам, т.е. запознавање со основните принципи за безбедно движење и престој во планина во зимски услови.

Ова е прв семинар со работни содржини од областа на зимскиот алпинизам. Вториот е планиран некаде за во месец Март, кога се очекуваат и постабилни временски услови, како и поквалитетна снежна подлога кои се неопходни за изведување на работните содржни кои ќе бидат главно насочени кон совладување на основните принципи за качување по технички терен во зимски услови со помош на орудија за качување во снег и мраз.

Сместувањето е по слободен избор, но со оглед на тоа што предавањата ќе бидат организирани во планинарскиот дом Смрека, таму би било и најсоодветото сместување. Според информациите добиени од ПК ‘‘Трансверзалец‘‘, цената на сместување во домот изнесува 360 денари.

Секој учесник во семинарот е должен да поседува комплетна опрема за активност на планина во зимски услови, да има активно членство во ФПСМ и осигурување од несреќа.

Распоредот на работните содржини ќе биде дефиниран на почетокот на семинарот, а во продолжение следува табларен преглед на темите кои ќе бидат обработени.

Тема	Број и вид на часови
Планирање и организирање на планинарска тура во зимски услови;	1 час теорија
Алпинистичка и планинарска опрема за качување и движење во зимски услови;	2 часа теорија
- Движење по планински терен во зимски услови; - Сидришта во снег; - Падови на заснежени падини;	2 х 3 часа практична работа
- Опасности во планина; - Предвидливи и непредвидливи екстремни ситуации во планина;	1 час теорија
Лавинологија	2 часа - теорија
	5 часа практична работа
- Основи на планинското спасување; - Спасување и самоспасување во зимски услови;	1 час теорија
	2 часа практична работа
Бивак во зимски услови	1 час теорија
	2 часа практична работа

 

 

10.02.2010 година

Костантин Циривири,
Македонска Алпинистичка Асоцијација

 

Патишка Река 19.01.2010

Го искористивме празничниот ден Водици, а воедно и интервјуто на Аце Дончев на една телевизија во Скопје за изложбата Алпи 2008, за да го посетиме локалитетот Патишка Река. Во Скопје се најдовме со Круно и ги договоривме деталите околу качувањето. Потоа заминавме за селото Патишка Река кое се наоѓа на 40 км од Скопје.
Пред пристигнувањето во селото заврна снег кој врнеше доста интензивно. Кога стигнавме во селото се беше прекриено со снег и по кратка подготовка тргнавме кон кулоарите. Се движевме по реката но како се искачувавме снегот беше се подлабок. По 2 часа стигнавме под кулоарите и увидовме дека постои голема лавинска опасност по што се одлучивме да се вратиме назад, видливоста беше мала, а температурата од -3 C до -5 C.
На акцијата учествувавме јас, Бобан Стојанов од АК Астрајон, Александар Дончев од АК Скала, Зоран Мајсторски од АК Плоча и Крунослав Аџиевски од АК Матка.

 

НОВИ ЗИМСКИ ПРВЕНСТВЕНИ ИСКАЧУВАЊА ВО ‘‘НОВ АЛПИНИСТИЧКИ ЛОКАЛИТЕТ‘‘

Во периодот од 20 до 24 Јануари група алпинисти од Македонската алпинистичка асоцијација, членови на АК ‘‘Апекс‘‘, АК‘‘Патагонија‘‘, СПК‘‘Магаро‘‘ и појачани со Круно од АК ‘‘Матка‘‘, направија серија првенствени искачувања во алпинистичкиот локалитет Магаро кој се наоѓа веднаш под самиот врв на Галичица.

Станува збор за насоки во снег и мраз кој се поставени во кулоари, гребени и плочи каде што техничките тежини се движат до 70 степени во снегот и мразот и III/IV во карпата. Должината на насоките се движи помеѓу 70 и 200 метри. Излезот на насоките е на височина од околу 2000 до 2100 метри, што  заедно со рељефот на теренот и околината пружа одлично чувство на вистинско алпинистичко искачување.

Во периодот на качувањето лавинската опасност во овој дел од Магаро била мала, но повторно напоменуваме (како и во препораките за Патишка Река) дека пред секое качување треба да се направи добра анализа на степенот на лавинската опасност.

После новите првенствени искачувања во локалитетот Патишка Река, бројот на новоискачени насоки во зимски услови се зголемува, а за наредниот период се планираат уште првенствени искачувања и во други локалитети.

Ова година Македонската алпинистичка асоцијација зимските искачувања  за напредните и искусните алпинисти ги насочува во ‘‘вистински‘‘ алпинистички локалитети, што е во контекст на активностите кои се планирани за 2010 година.

Се разбира не се запоставуваат и тренинзите за dry tooling и качување во кратки мразеви кои се одлични за техника и силови тренинзи, меѓутоа комплетните ситуациони тренинзи се реализраат во ‘‘посериозни‘‘ локалитети каде што владеат реални планински услови.

За престојниот викенд планирани се искачувања во неколку локалитети, од Магаро на Галичица, до Бистра, а за почетниците ќе бидат организирани качувања на кратки парчиња мраз по долината на реката Радика.

Од идниот викенд ќе започне со работа и алпинистичкото училиште на МАА што се организира заедно со ЦСО при ФПСМ, со тоа што оваа година ќе се работи со две категории алпинисти - почетници и напредни алпинисти. За разлика од минатата година активностите со двете категории ќе се одвиваат во одвоени групи, пред се заради овозможување подобри услови за работа на алпинистите во напредната група.
Доколку се обезбедат потребните финансиски средства, ќе бидат организирани и две до три излегувања надвор од Македонија во текот на зимскиот период.

Скопје, 5.02.2010 година.
Костантин Циривири,
Македонска Алпинистичка Асоцијација

 

 

 

ДВЕ ЗИМСКИ ПРВЕНСТВЕНИ НАСОКИ НА ПАТИШКА РЕКА

Во Среда на 13 Јануари 2010 година, Крунослав Аџиевски (или поедноставно само Круно) од АК ‘‘Матка‘‘ Скопје, искачи две првенствени насоки во алпинистичкиот локалитет Патишка Река.

Насоките се од комбиниран тип - снег, мраз, карпа и се протегаат низ кулоари, карпа и гребен.

Должината на насоките засега не може точно да се утврди бидејки Круно качуваше сам без јаже, па не користеше ‘‘единица мерка‘‘ (обично тоа е една јажева должина или ‘‘цуг‘‘), и затоа не може со сигурност да каже колку изнесува должината на качените насоки, но според мерењата што ги направија со ГПС во Неделата, три дена претходно (кога се спуштаа со скии/сноуборд заедно со Борче Јаневски - Шуки), таа би требало да се движи помеѓу 600 и 1000 метри.

Тежината на насоките варира помеѓу 50 и 80 степени нагиб во снегот и мразот и III и IV по UIAA во карпата. Можностите за осигурување во мразот биле лоши заради релативно високите температури во претходните денови, додека пак карпата нудела добри услови за клинови, чокови и френдови.

На долните фотографии со сина боја се означени насоките кои се минати во качување, а со црвена боја е насоката на симнување, истата што неколку денови претходно заедно со Шуки ја скијаа.

Според зборовите на Круно, условите во снегот и мразот не биле ‘‘баш идеални‘‘, а заради снежните врнежи од претходната ноќ, иако само неколку сантиметри, Круно имал ‘‘средба‘‘ со една лавина, и тоа на многу деликатно место со голема експонираност под излезот од кулоарот. Но за среќа се завршило само со ‘‘кратка прегратка и разминување‘‘ - лавината си продолжила по својот пат надолу, а Круно си останал на своето место закачен за бајлите.

Круно веќе подолго време интензивно тренира (искрено си ја посакува IFMGA лиценцата), посебно во делот на општофизичката издржливост, па затоа и не треба да изненадува што целата работа е завршена (од сред село Патишка Река до сред село) за помалку од шест часа.

Локалитетот Патишка Река дефинитивно станува еден од најтрактивните локалитети за качување во зимски услови, посебно заради близината до Скопје и разновидноста на алпинистичките проблеми што лежат таму. Апелирам до сите кои имаат намера да се движат или да качуваат над Патишка Река, да обрнат големо внимание на лавинската опасност. Таа во овој локалитет е многу голема и барем засега, многу е тешка за предвидување. Круно пред да започне со качувањето на неколку пати направил лавински тестови и сите параметри укажувале дека ситуацијата е во ред, но горе, на 2000 метри, во излезот од кулоарите ситацијата била различна. Затоа апелираме ВНИМАВАЈТЕ НА ЛАВИНСКАТА ОПАСНОСТ кога одите над Патишка Река.

Наскоро ќе следува текст од Круно каде што ќе бидат изнесени сите детали од качувањето.

14.01.2010 година
Костантин Циривири

 

 

РЕАКЦИЈА - КАНДИДАТУРА ЗА СПОРТСКИ ОСКАР ВО КАТЕГОРИЈАТА АЛПИНИСТИЧКО ДОСТИГНУВАЊЕ, ПО ПОВОД ИСКАЧУВАЊЕТО НА АЈЛЕНД ПИК

Претседателството на Македонската алпинистичка асоцијација, за кратко време веќе по втор пат се обраќа до јавноста по повод злоупотребата на поимот алпинизам и дефиницијата на дејноста, како и девалвирањето на вредностите на македонскиот алпинизам.

Очигледно дека грешките направени во минатото, во поглед на институционалната и административна организација на алпинизмот во Република Македонија, излегуваат на површина, па како институција која треба и мора да се занимава со креативна организација на алпинизмот, наместо тоа, ние сме принудени да објавуваме деманти, соопштенија, оградувања и сл.

Сето ова што во последниов период се случува околу алпинизмот, почнувајки од суптилните дискредитации од страна на алпинисти, па се до последните случувања кога со алпинизмот се поистоветуваат активности кои можеби немаат ништо заедничко ниту со планинарството ниту со спортот, укажува само на едно - алпинистичката организација мора да посвети многу повеќе енергија кон институционалната поставеност на алпинизмот, вклучувајки и постапки за правно дефинирање на организираниот алпинизам во Република Македонија.

Пропустите се наши, алпинистички, и јас како Претседател на Македонската алпинистичка асоцијација превземам врз себе најголем дел од одговорноста за ваквата состојба, но едновремено ветувам дека во најскоро време ќе бидат превземени неопходните мерки, како административни така и практични, за заштита на интегритетот и суштинскиот идентитет на македонскиот алпинизам.

Бесмислено е на официјалната веб страна на македонската алпинистичка организација да се коментираат настаните и постапките на поединци, тоа навистина е премногу за нас, ние сме само алпинисти, за третман на таквите појави постојат специјализирани здравствени установи.

Но од друга страна во интерес на заштитата на идентитетот на македонскиот алпинизам и сето она што е направено од сите досегашни генерации алпинисти, принудени сме да реагираме со објаснување дека искачувањето на врвот Ајлен Пик висок 6189 реализирано од страна на граѓани на Република Македонија, кои невистинито се преставуваат како алпинисти НЕ ПРЕСТАВУВА АЛПИНИСТИЧКА АКТИВНОСТ за која воопшто не се потребни алпинистички квалификации, и достигнувањето не преставува алпинистички успех. За тежината на успехот од аспект на планинарството или спортот воопшто немаме намера да коментираме, но се надеваме дека Македонската Планинарска Асоцијација нема да дозволи вреднување на резултатите според лични критериуми.

Секое индивидуално достигнување на планина има огромна вредност и големо значење. И пораката што ја праќаме до општеството преку нашите активности на планина се вредни и со голема и важна цивилизациска тежина. Но кога треба некој резултат да се категоризира според спортските критериуми, тоа не смее да се прави според личните импресии или степенот на лична возбуда што со себе ја носи активноста, ТУКУ ИСКЛУЧИВО СПОРЕД МЕРИЛАТА ВО СООДВЕТНИОТ СПОРТ.

Она што во оваа ситуација најмногу не загрижува е тоа што станува збор за доделување на една од најпрестижните награди во спортот на државно ниво. Соодветно на важноста и тежината на наградата, државата како организатор на манифестацијата треба да се потруди зад секој спортски предлог да стојат издржани авторитети т.е. институциите кои се надлежни за организирање на соодветниот спорт и кои се единствено компетентни да даваат мислење за квалитетот на спортските достигнувања. Во овој случај тоа не е направено.

На официјалната страна за доделување на признанието ‘‘спортски оскар‘‘ квалификацијата на Биљана Серафимовска е образложена со достигнување во алпинизмот. Би ја запрашале комисијата задолжена за вршење на изборот, но и Агенцијата за млади и спорт на Република Македонија, дали за ваквата квалификација побарала мислење од страна на ЕДИНСТВЕНАТА НАДЛЕЖНА ИНСТИТУЦИЈА ВО РЕПУБЛИКА МАКЕДОНИЈА КОЈА ГО ОРГАНИЗИРА МАКЕДОНСКИОТ АЛПИНИЗАМ - МАКЕДОНСКАТА АЛПИНИСТИЧКА АСОЦИЈАЦИЈА.

Одговорот, за жал како и многу пати досега е не. Еден куп ‘‘мешетари‘‘ дефилираат низ државните институции памфлетирајки со податоци за македонскиот и светскиот алпинизам и преставувајки се во наше име. Па дури и повеќе од тоа, од името на некаков ‘‘над алпинизам‘‘. Резултатот е финансиска поткрепа на Македонската алпинистичка асоцијација со која што не можеме да одпатуваме ни до Демир Капија, а да не зборуваме за организиран третман на спортот или реализација на покомплексни алпинистички акции од државен карактер.

Каква брука ќе биде доколку некој, барем површен познавач на планинарството и алпинизмот од странство, ја следи целата работа околу манифестацијата ‘‘спортски оскар‘‘. Какво ќе биде мислењето за Република Македонија и нашиот институционален пристап кон спортот пред очите на странските набљудувачи кога при доделување на високи признанија, иако од популарен карактер, си дозволуваме аналфабетски грешки. Случајно или намерно? Да е прв пат секој би рекол - се случува, арно ама не е прв пат.

Дали случајот со овогодишниот спортски оскар е последниот недвосмислен сигнал упатен до македонските алпинисти дека конечно треба да го смениме начинот на однесување, па да привлечеме малку внимание врз себе, на истиот начин како што го прават тие што настапуваат во наше име - името на македонските алпинисти, а кои никогаш ниту биле ниту можат да бидат алпинисти, но имаат талент ‘‘секогаш да располагаат со доверливи информации за нашиот квалитет и активност‘‘. Дали треба и ние да излеземе со по некоја доверлива информација? Информации имаме многу, за секого по нешто, но дали е тоа во интерес на планинарските спортови? Дали е тоа во интерес на заедничката идеја на постоењето и здружувањето во ФПСМ?

Македонската алпинистичка асоцијација ќе започне итен процес за правно дефинирање на организираниот алпинизам во Република Македонија и за заштита на поимите ‘‘алпинист‘‘ и ‘‘алпинизам‘‘, како и заштита на идентитетот на македонскиот алпинизам. За почеток тоа. За понатаму ќе видиме, ќе зависи од нашите ‘‘партнери‘‘ во играта.

 

Скопје, 11.12.2009 година.

 

Костантин Циривири,
Претседател на
Македонската алпинистичка асоцијација

 

РЕАКЦИЈА - ЗАШТИТА НА ИДЕНТИТЕТОТ НА МАКЕДОНСКИОТ АЛПИНИЗАМ

Заради се позачестената појава во последниот период на обиди за девалвирање на угледот на Македонскиот Алпинизам и обидите за уништување на неговиот идентитет, како и идентитетот на алпинизмот како дејност воопшто, Македонската алпинистичка асоцијација ќе започне со спроведување активности кои имаат за цел објективно информирање на јавноста за суштинската дефиниција на  алпинизмот како спорт и философија на живеење и неговата институционална организираност во Република Македонија.
Во продолжение следува писмото испратено до Охридските медиуми и јавноста со кое што ја започнуваме кампањата на Македонската алпинистичка асоцијација за одбрана на вредностите на македонскиот организиран алпинизам.

                                                                           

Костантин Циривири
Македонска алпинистичка асоцијација

 

Реакција до Охридската јавност и медиумите
- По пoвод доделувањето на Св. Климентовата Награда и истоимените Повелби од страна на Општина Охрид

Почитувани,

Последниве денови сведоци сме на постојано девалвирање на алпинизмот како спорт на што не можеме да останеме рамнодушни и едноставно да премолчиме.
Македонската Алпинистичка Асоцијација со жалење, по којзнае кој пат мора да реагира до медиумите поради ваквиот однос, со што директно се девалвира Македонскиот алпинизам и се она што генерации македонски алпинисти го граделе и по што македонскиот алпинизам станал препознатлив во светски размери.
Најнапред мораме да Ве информираме дека лицето Мишко Танески не е член на МАА и не е носител на ниту еден алпинистички назив според правилникот и критериумите на МАА.
Од друга страна, претставувањето на егзотични светски туристички дестинации како сериозни спортски достигнувања претставува удар врз десетици млади македонски спортисти и врз нивните секојдневни напори за унапредување на спортот и постигнување на вистински достигнувања.
Секоја чест за луѓето кои имаат можности да си ги остваруваат своите соништа што е нормално и многу убаво, но нивното воздигнување од страна на медиумите до степен на врвно спортско достигнување претставува вистинско понижување за спортот.
Она што последниве денови се претставува како ,,алпинистички успех, кој за првпат е постигнат од охридски и македонски алпинисти... итн, Господа, еднакво e како да напишете дека “седењето во прв ред на трибините од финалето на Светско првенство во фудбал е најголемото македонско и охридско фудбалско достигнување и дека со тоа некој на врвен начин го промовирал нашиот град и државата“, а при тоа едноврмено имате фудбалска репрезентација која со години се бори да стигне до терените на едно светско првенство и таму, на вистински начин да ги брани боите на државата.
За да биде понижувањето уште поголемо за ваквите туристички прошетки Локалната самоуправа на општина Охрид доделува Св. Климентова Повелба за заслуги и промоција на Градот, со што покрај девалвирањето на алпинизмот се девалвира и самото признание.
И на крајот, МАА е свесна за непознавањето на алпинизмот од страна на медиумите кое произлегува од неможноста да се следат алпинистичките активности поради нивната комплексност и недостапноста на терените каде што истите се одвиваат, но апелираме за поширока соработка од страна на медиумите и стоиме на располагање за се што ве интересира од областа на македонскиот и светскиот алпинизам слободно да ни се обратите.

Со Спортски Поздрав,

 

Од името на
Македонската Алпинистичка Асоцијација
Антонио Додевски

член на Претседателството на Асоцијацијата
и Претседател на
АК “ПАТАГОНИЈА’’ - Охрид

---

Cостанок на Претседателството на Македонската Алпинистичка Асоцијација.
09.11.2009

Во Неделата на 8 Ноември 2009 година, се одржа состанок на Претседателството на Македонската алпинистичка асоцијација на кој се дискутираше за идните активности на МАА како и за изготвување генерален план за работа во текот на наредната година.

На состанокот беше донесена одлука планираните акции за во месец Ноември оваа година да се одложат на неодредено време заради лошите временски прилики кои владеат во поширокиот регион.

Договорено е за наредниот период да се одржат два семинари за подготовка и полагање повисоки алпинистички називи, при што вториот семинар ќе биде и испит. Ќе се организираат полагања за речиси сите алпинистички називи. Точниот термин на семинарите ќе биде одреден до крајот на оваа седмица откако клубовите ќе достават предлог термини за истите.

На семинарот беше донесена одлука од Јануари 2010 година да се започне повторно со обука на апсолутни почетници на ниво на МАА, а до тогаш подготвителните активности со оваа категорија алпинисти ќе се одвиваат во рамките на клубовите.

Секој АК член на МАА е обврзан да формира училиште за почетници. Програмата за работа со почетниците и покрај тоа што главно ќе се одвива на ниво на клубови, ќе биде единствена за сите клубови. И останатите материјали како што се флаери, формулари, постери и слично, ќе имаат униформен изглед, со цел подобро презентирање  на алпинизмот и МАА во јавноста како единствена организација што ги спроведува организираните алпинистички активности во Република Македонија.

9 Ноември 2009 година.

Костантин Циривири,
Македонска алпинистичка асоцијација

---

Изложба Алпи 2008.
02.11.2009

По одржаната изложба летово во  Охрид на тема Алпи 2008 од авторот Александар Дончев на ред дојде и изложбата во Штип. Во организација на алпинистичкиот клуб Астрајон од Штип изложбата е отворена од 2 до 5  ноември  во уметничката галерија Безистен. Присутните на отворањето имаа можност да се запознаат со дел од тоа што претставува алпинизмот преку одржаниот говор и убавините кои со себе ги носи алпинизмот прикажани на прекрасните пејсажи од Алпите и Доломитите.

 

---

Посета во Банско на Валтер Бонати.
02.11.2009

На 31.10.2009г. во Банско,р.Бугарија во 17 часот се одржа презентација на книгата Моите спомени-Валтер Бонати.Како претставници на МАА бевме Бобан Стојанов од АК Астрајон и браќата Аџиевски од АК Матка.Презентацијата започна со кратки цитати од книгата и преку лични искуства на самиот автор.

Валтер Бонати е најголемиот алпинист на светот во 50-те и 60-те години на 20-от век. Автор е на феноменални соло искачувања на Алпите.Има голем придонес за Италијанската премиера во 1954г. на најубавиот и најтежок осумилјадник-К2 (8611м.).Тој е Гуру на светскиот алпинизам,влијаел на поколенија алпинисти од цел свет,тој е еден од најталентираните писатели на планинарска тема.

Цитат од книгата:
Еден урок кој што го научив  добро, е дека:смелоста и успехот не се простуваат никогаш затоа сто тие се препишуваат само на оние што не се откажуваат пред пречките и тешките моменти во животот.Каква е пораката на оној, кој што искачува една невозможна ”планина и победува,но по истиот начин губи или со достоинство демонстрира совест и страв? Пред лицето на неизвесноста којашто се крие во планината и којашто во секој еден момент може да ја раскрие својата најгруба и сурова страна, човек би можел да се откаже и да отстапи,за да има возможност покасно да се преоткрие себе си. Но луѓето не ги сакаат оние коишто им припомнуваат какви би требало да бидат,но какви всушност не се.

Валтер Бонати

 

---

АЛПИНИСТИЧКА АКЦИЈА ВО ВРАЦА - БУГАРИЈА .

Во периодот од 5 до 9 Ноември 2009 година ќе се реализира  алпинистичка акција на Македонската Алпинистичка Асоцијација во алпинистичкиот локалитет Враца во Република Бугарија.
Право на учество  имаат сите активни членови на МАА кои биле редовни на најмалку три последни алпинистички собири организирани од страна на МАА и кои се способни за качување како први во алпинистички насоки со тежина од IV+ и повеќе.
Трошоците за превоз и исхрана на учесниците во акцијата ги покрива МАА.

Раководител на акцијата ќе биде Зоран Мајсторски од АК ‘‘Плоча‘‘ од Радовиш. 

Втората алпинистичка акција планирана за оваа есен во Пакленица - Хрватска, ќе се реализира во средината  на Ноември. Бројот и изборот на учесниците ќе биде одреден на состанок на Претседателството на МАА. 
Дополнителни  информации може да се добијат кај:
Зоран Мајсторски - 070/ 550 058
Костантин Циривири - 071/ 369 280 
 
30 Октомври 2009 година.
Македонска  Алпинистичка Асоцијација

---

Покана од АК "АСТРАЈОН"- Штип.

Во понеделник, на 02-11-2009 год., во 18:00 часот во просториите на Уметничката галерија “Безистен” во Штип ќе биде отворена изложбата на фотографии на авторот Александар Дончев под наслов АЛПИ 2008, направени при алпинистичката експедиција на Алпите 2008 година, што ја организираше Македонската алпинистичка асоцијација.

Изложбата ќе биде отворена до 05-11-2009. Организатор на изложбата е алпинистичкиот клуб Астрајон од Штип и Македонската алпинистичка асоцијација.

Ни преставува голема чест и задоволство да ги поканиме сите алпинисти, планинари и љубители на фотографија да ја посетат оваа изложба која е од големо значење за македонскиот алпинизам и која ќе придонесе за поголема промоција на истиот во Република Македонија.

AK "Астрајон" - Штип

---

Обука на Алпинистички Водачи според Меѓународниот Професионален Стандард IFMGA - стратегија на МАА за работа во наредниот петогодишен период.

Како што беше објавено во делот на извештаите од состанокот на Претседателството на МАА одржан на Плоча на 21 Септември 2009 година, на истиот беше донесена одлука да се започне со процес на обука на професионални алпинистички водачи во Македонија, според единствениот светски стандард за професионално работење на алпинистичките водачи - IFMGA (International federation of mountain guides associations).

Во суштина процесот за започнување со обука на македонски алпинисти за меѓународниот професионален стандард е започнат уште пред неколку години, поточно во 2006 година, но досега не беа задоволени некои технички услови за да може овој процес и формално да започне.

Паралелно со процесот за обука на алпинистичките водачи од Македонија - од МАА, ќе започне и процес за зачленување на струковата организација на алпинистички водачи во Македонија во меѓународната организација - IFMGA.
Се разбира, согласно со стандардите на IFMGA, македонската организација на алпинистички водачи ќе мора да се функционира како одвоен субјект од  домашната спортска алпинистичка организација, т.е. сега МАА, а во иднина федерацијата за алпинизам.

Кои се административно техничките услови што треба да бидат задоволени за да започне овој процес?

Прво и основно, Република Македонија треба да биде препозната од страна на IFMGA како земја каде што има потенцијал за алпинистички искачувања, а со тоа, понатаму, и услови за професионално работење на идните водачи.
Овој дел од работата е завршен. За време на средбите што ги имавме во текот на минатата година (Јуни 2008, во Гренобл, Франција) со Претседателот на IFMGA, Господинот Bruno Pellicier, добивме ветување дека IFMGA ќе го подржи процесот на апликација за членство на Македонската организација на алпинистички водачи. Оваа година очекуваме и официјална потврда во оваа насока од страна на раководството на меѓународната организација.

Второ, неопходно е нашата земја, т.е. МАА која на почетокот ќе биде носител на процесот на обуката на идните водачи, да одбере земја, т.е. организација што ќе биде наш ментор во целиот процес. Менторството не е едноставна работа, бидејки луѓето од организациите кои работат на обука на идни професионалци и самите се професионалци и нивниот ангажман од една страна чини пари, а од друга страна  треба да се покријат различни трошоци како што е патувањето на инструкторите во Македонија, патување на нашите кандидати на обука, тестови и испити во земјата ментор и сл. Ние, ниту како поединци, а за жал со рејтингот што го имаме пред државните институции, ниту како организација немаме сили за обезбедување  на овие средства. Единствена опција е да се најде ментор кој самиот ќе се избори за донација - фонд, за реализација на овој проект. За време на минатогодишната акција во Алпи-те во Септември 2008 година, при контакти со една странска организација која се занимава со професионална обука според IFMGA стандардот, успеавме да ‘‘завршиме‘‘ добар дел и од овој сегмент, но се разбира не целосно, бидејки за да започне целиот процес кај организацијата што е ментор на обуката потребно е претходно да се мине низ не баш едноставни административни процедури.

Трето, и за нас можеби најважно е тоа што во моментов во Македонија треба да има најмалку петнаесет алпинисти кои ќе го положат приемниот испит и од кои најмалку десет успешно ќе го завршат процесот на обука.
Обуката за водач според IFMGA стандардот е тешка и напорна работа, многу потешка одколку студирање некој просечен факултет, па во моментов е потребна дополнителна мотивација за македонските алпинисти за влегување во обука според IFMGA критериумите.
Кај нас има многу алпинисти кои сакаат да зборуваат за вистински алпинизам, да пишуваат по некој текст или да објават по некоја фотографија од овде или некаде, но малку потешко се решаваат за зачекорување во професионалните води и работа по строги и прецизно дефинирани стандарди. Да се надеваме дека во блиска иднина, до наредната пролет  кога ќе треба да ги прецизираме разговорите со партнерите од странство, ќе имаме доволна бројка на реални ‘‘јунаци‘‘ кои ќе ја превземат врз себе пионерската улога на овој веројатно најзначаен момент во нашиот алпинизам.

Што значи обуката на водачи според IFMGA стандардот и што значи членството на Македонија во оваа светска организација?

Прво, IFMGA сертифкатот е највисокиот меѓународно прифатлив факт за нивото на алпинистичкиот квалитет на еден поединец или земја / организација, не само во делот на туристичкото работење со клиенти, туку пред се во општа алпинистичка смисла. Во прилог на тоа говорат и дел од критериумите за приемниот испит што накратко ќе ги изнесам во продолжение:

- Искачување непознати насоки во карпа, во соло стил, без користење на никакво обезбедување, со тежина од најмалку IV+ по UIAA и должина од 500 метри и повеќе.

- Качување насоки во карпа обработени со експанзиони клинови со тежина најмалку VII по скалата на UIAA и должина од педесетина метри.

- Познавање на основната техника за движење по глечери.

- Качување во мраз, како прв, насоки со тежини од 5 и повеќе според шкотската скала.

- Познавање на основната техника за скијање надвор од обработени ски патеки.

Понатаму членството на Македонија во IFMGA и присуството на сертифицирани водачи според овој стандард, значи многу во прилог на нашиот рејтинг при асоцирање во меѓународните алпинистички организации и институции кои се занимаваат со алпинизам, посебно за организациите кои се занимаваат со планинскиот туризам.

Кај нас често може да се слушнат смешни коментари дека професионалното работење како водач во планина или алпинистички водач го одалечувало вистинскиот алпинист од вистинскиот алпинизам.

Во денешни услови на функционирање во светот на алпинизмот, кои можат да се поткрепат со голем број факти - врвни алпинистичка имиња кои се професионални водачи во планина, професионалното занимавање со работа со клиенти на планина може само да придонесе за подобра алпинистичка форма, поинтензивен контакт со планината и многу почиста релација со вистинскиот алпинизам.

Каков апсурд е размислувањето дека обезбедување егзистенција преку работа во кацеларија или било што друго кое нема никаква врска со планината, може да придонесува за ‘‘чист‘‘ однос кон алпинизмот а целосната посветеност на планината, гледајки ја како своја професија го ‘‘загадува‘‘ целиот процес?!

Во суштина станува збор за имање или немање храброст да се биде професионалец, дури и по локалните критериуми, бидејки самата определба за професијата, колку и да е таа декларативна, наметнува голема одговорност во алпинистичкото делување.

Во Македонија имаме сериозен алпинистички капитал во смисла на наталожено искуство низ повеќето алпинистички генерации и уште поголем капитал во потенцијалот на квалитетно обучените млади алпинисти чие што време допрва доаѓа, и токму затоа сум убеден дека процесот за членство во IFMGA што го започнавме со неколку ентузијасти, ќе се претвори во реална шанса не само за алпинистите и македонскиот алпинизам, туку за целото македонско општество.

Доколу некој од било која причина се плаши од целиот овој процес, во МАА ќе добие помош за подобро и поцелосно информирање во овој правец и се разбира подобро и целосно созревање во алпинистичка смисла.

Македонскиот алпинизам зачекорува во еден нов период на забрзано приближување кон светот и сите алпинисти што не се плашат од вистинскиот алпинизам треба да бидат дел од овој процес. Да се обидеме да работиме секој врз себе и да направиме сериозно поместување од пропаганден кон реален алпинизам. Гледањето филмови, читањето книги, присуството на интернет, листањето фотографии, правењето муабет за алпинизмот се убава работа, но качувањето на карпа, систематскиот тренинг, работата со почетници и спроведувањето на реална стратегија, го прават алпинизмот да биде вистински.

Во Македонија има услови за вистински алпинизам повеќе од кога и да било порано!

Костантин Циривири,
Македонска Алпинистичка Асоцијација

---

Конкурс за учество во Алпинистичка Акција во Пакленица, Р.Хрватска.

Главната алпинистичка акција на МАА за оваа година, предвидена за реализација надвор од Република Македонија ќе биде изведена во качувачкиот локалитет Пакленица во Република Хрватска. Времето за реализација начелно е планирано за последната декада од Октомври или почетокот на месец Ноември.

Акцијата во Пакленица ќе се реализа како ‘‘резерна‘‘ варијанта на главната алпинистичка акција за 2009 година која првично беше предвидена да се изведе во Централно Европските Алпи, но заради доцнење на средствата од Агенцијата за млади и спорт на Република Македонија, истата беше одложена. Земајки ја во предвид подготвеноста на македонските алпинисти во овој момент, како по специфичност во однос на поширокиот спектар алпинистички дисциплини, така и во поглед на квалитетот, акцијата во Пакленица е најдобар избор. Накратко тоа беа и аргументите насочени во прилог на изборот на овој локалитет во текот на дискусијата по ова прашање што се водеше за време на состанокот на Претседателството на МАА одржан на 21 Септември 2009 во локалитетот Плоча. На истиот состанок беше донесена одлука учеството во акцијата да биде преку отворен конкурс на кој можат да се пријават сите алпинисти кои се членови на МАА.

Во продолжение следуваат критериумите за учество во акцијата:

1. Ниво на алпинистичка подготвеност за качување во сува карпа.
2. Минато искуство во делот на алпинистички искачувања на сува карпа, посебно искуство во качување во локалитети надвор од Македонија и во ‘‘непознати карпи‘‘.
3. Способност за тимска работа.
4. Редовност во акциите - собирите организирани од страна на МАА во текот на изминатата година, регулирано членство, осигурување...

Планот за изведување на акцијата во Пакленица предвидува учество на 12 алпинисти кои би требало да заминат со три возила, меѓутоа ниту една бројка, во било која смисла, не е императив за реализирање на акцијата.
Пријавите за учество треба да се достават по електронски пат на адресата на МАА: macedonian_alpine_club@yahoo.com, најдоцна до 19 Октомври 2009 година, кога ќе биде организиран состанок на Претседателството на МАА во проширен состав, на кој што ќе биде дефиниран списокот на учесници.

Дополнителни информации може да се добијат во МАА при ФПСМ.

 

Скопје, 9 Октомври 2009 година.

 

Костантин Циривири,
Претседател на Македонската Алпинистичка Асоцијација

---

МАКЕДОНСКАТА АЛПИНИСТИЧКА АСОЦИЈАЦИЈА ЌЕ БИДЕ ФЕДЕРАЦИЈА. Измени во организационата структура на ФПСМ.

Минатата Среда, 30 Септември беше одржана седница на Претседателството на ФПСМ со единствена точка на дневниот ред - идната организациска структура на ФПСМ.

Главниот акцент на дискусиите беше насочен во правец на изнаоѓање законски прифатливо, но и суштински ефикасно решение за поставеноста и дефинирањето на спортовите во рамките на сегашната ФПСМ.

Од повеќето предлози и идеи кои сега веќе нема потреба да се анализираат во смисла кој и зошто ги протежирал, прифатена е опцијата сите спортови во ФПСМ, т.е. досегашните асоцијации, да се организираат во државни федерации и истите да бидат здружени меѓусебно во заедничка организација на сите планинарски спортови, тоа што е сега ФПСМ. Името и начинот на здружување засега не се важни, за тоа ќе се најдат најприфатливите практични и законски решенија, важно е да се почитува фактот за биолошката поврзаност помеѓу планинарските спортови и потребата од координација при активностите.

Во Понеделникот оваа седмица, на 5 Октомври, одржана е работна средба на преставници од спортовите - асоцијациите/федерациите во ФПСМ со одговорни лица во Агенцијата за млади и спорт на Република Македонија. На средбата присуствуваше и преставник на МАА - Ристе Калинов (Претседателот на МАА поради одсуство од Скопје заради одржувањето на семинарот за планински туризам во Охрид, не беше во можност да присуствува). На состанокот во Агенцијата уште еднаш бил потврден нивниот став и подршка кон организирањето  на спортовите во ФПСМ во облик на федерации, при што било нагласено дека на тој начин значително би се олеснила работата и на Агенцијата, која во моментов тешко се снаоѓа со комплицираната организациска поставеност на спортовите во ФПСМ.

Македонската алпинистичка асоцијација извесен период спроведува стратегија за дефинирање и организирање на алпинизмот како засебен спорт, со сопствена федерација, но во блиска соработка со останатите планинарски спортови како сродни по медиумот на делување, но различни по начинот на спроведување и организирање на активностите. Овие промени се дел од залагањата на МАА за конструктивни промени во планинарските спортови со единствена цел враќање на некогашното општествено значење на истите.

Во прилог на овие активности МАА апелира до сите клубови да ги забрзаат процесите за правно регулирање на работата во алпинизмот, пред се за добивање решение за вршење дејност спорт - алпинизам, како и за доследно почитување на одредбите од Законот за спорт и Правилникот за работа на МАА.

Исто така апелираме и до сите клубови / друштва каде што има одреден вид на алпинистичка активност или иницијатива за истата, да се обратат кај МАА заради стручно, безбедно и законски прифатливо организирање на истата.

Раководството на МАА нема илузии дека со формирањето алпинистичка федерација ќе се случат ‘‘невидени чуда‘‘ но верува дека тоа е првиот и неопходен чекор за алпинизмот како спорт и дејност да го завземе местото во општеството кое многу одамна го заслужува.

Исто така, во овие по многу што важни моменти за македонсиот алпинизам ја очекуваме подршката на сите алпинисти, независно од тоа на која генерација или стил им припаѓаат. Сега се работи за Македонскиот Алпинизам и потребно е конструктивно делување на сите кои сакаат нашиот алпинизам да биде дел од светската алпинистичка реалност.

Како Претседател на МАА од името на Претседателството на асоцијацијата  изјавувам дека секогаш сме подготвени за контакти, средби и соработка со сите алпинисти. Како никогаш порано иднината на македонскиот алпинизам е во наши раце.

 

Скопје, 8.10.2009 година.

 

Костантин Циривири,
Претседател на Македонската алпинистичка асоцијација

---

Препорака до алпинистичките клубови - измени во статутите  и правилниците за работа.

Им се препорачува  на сите алпинистички клубови кои  се членки на Македонската алпинистичка асоцијација или сакаат да станат нејзини членки, да ги прилагодат своите статути и правилници за работа согласно со одредбите од Законот за спорт и тенденциите на МАА за дефинирање на алпинизмот како засебен спорт.  

Имено,  во делот  од актите за работа каде што се опишуваат  активностите со кои се занимаваат клубовите, треба да се наведат само алпинистички активности а не и активности од други спортови, вклучувајки ги и планинарските спортови. 

Тоа ќе биде наш придонес кон подобро дефинирање и организирање на алпинизмот во Република Македонија, но и придонес кон подобра идентификација и организација и на другите планинарски спортови. 

Скопје, 28.09.2009 година. 

Македонска Алпинистичка Асоцијација

Претседател: Костантин  Циривири

---

Извештај за Алпинистички Собир 20-21 Септември 2009 локалитет Плоча.

Во изминатиот викенд на алпинистичкиот локалитет Плоча  беше одржан едукативниот семинар во согласност со програмата за работа на Македонската Алпинистичка Асоцијација.
Според работната содржина доставена од МАА , тематски и практично зададени беа следниве задачи за изработка:

- Работа со учесниците во алпинистичкото училиште на МАА;
- Критериуми, мерки и постапки за безбедност во алпинизмот;
- Качување по избор;  

Работа со учесниците во алпинистичкото училиште на МАА и системи за извлекување, спасување и укажување помош во карпа

Едукативниот и практичниот дел од програмата за учесниците беше составен од неколку групи поделени во карпа контролирано од алпинист Зоран Мајсторски. Изработени и повторени беа сите базичните системи (Св.Бернард) и ситуации за извлекување и укажување на било каква помош во карпа од било каков карактер , работа со напредна алпинистичка опрема во карпа (френдови , чокови , хексови итн.)  и правилно искористување и поставување на истата.
Мора да се напомене како за членовите на МАА и клубовите во нејзе така и за сите останати алпинисти дека од суштинско значење е безбедноста и дека е потребна редовна пракса на сите елементарни системи за укажување помош во карпа.

Качување по избор

Составен дел од семинарот беше и качувањето по избор и на алпинистите кои беа присутни од Скопје , Штип , Охрид , Радовиш и Прилеп. Карактеристично e тоа што беше променливо качувањето , промена на партнерите и  промена во стилот на качување беа примарни поради подобра комуникација и напредување на некои од алпинистите кои беа присутни.  
Се обрна исто така внимание во подготовка и припреми за влез во алпинистичка насока , проверка на партнер , одбрана опрема и проверка на истата , прва помош , непотребни грешки кои би се направиле итн.

Критериуми, мерки и постапки за безбедност во алпинизмот

Работните содржини кои беа вклучени во програмата за работа беа задолжителни за сите членови на МАА. Без учеството во овие работни содржини немаше да може да се обнови алпинистичкиот назив во наредната година ниту пак да се учествува во акциите организирани од страна на МАА.
Делот од предавањата беа одржани и од самите присутни алпинисти.

Алпинист кандидат за Инструктор Зоран Мајсторски
Подготовка за безбедно изведување во едно врвно алпинистичко искачување.

Алпинист кандидат за Инструктор Бобан Стојанов
Безбедност на алпинистичката опрема.

Алпинист (Инструктор) Водич и Претседател на МАА  Константин Циривири
Општо за безбедноста во алпинизмот.

Делот во кој и беше таргетирано поголемото вниманието беа теоретските предавања кои беа од круцијално значење за сите наредни алпинисти и кандидати за повисоко достигнување. Подготовка за алпинистичко искачување ,  безбедноста на самата опрема вклучена во качувањето (јажиња, карабинери , појаси, надворешни влијанија), организацијата и информацијата пред некое било какво сериозно искачување или навлегување во карпа , сериозноста која е вклучена во алпинизмот како спорт и како дејност неговото суштинско значење и психичката подготовка на алпинистот.
Институционалното функционирање на МАА и кадарот кој е обучен во изминативе години и оние во кои следуваат треба да биде продукт на големи и врвни алпинистички достигнувања во наредниот период.

Извештајот за состанокот на Претседателството на Македонската Алпинистичка Асоцијација која го имаше на семинарот е веќе поставен.

Здравко Спасев
АК Матка

---

СОСТАНОК НА ПРЕТСЕДАТЕЛСТВОТО НА МАА - Извештај за донесените заклучоци.

За време на редовниот алпинистички собир во локалитетот Плоча се одржа состанок на Претседателството на Македонската Алпинистичка Асоцијација. На состанокот присуствуваа сите членови на Претседателството со исклучок на Мики од Тетово (Мирослав Ристовски АС при ПК ‘‘Љуботен‘‘, Тетово).

Состанокот се одржа според следниов дневен ред:

1. Утврдување на план за активности до крајот на 2009 година.
2. Донесување план за уредување на алпинистичките локалитети.
3. Планирање на наредните активности во правец на промоција и популаризација на алпинизмот.
4. Дефинирање на организациската поставеност на МАА и започнување процес за обука на алпинисти според IFMGA стандардот за професионални алпинистички водачи.
5. Разно.

1. Утврдување на план за активности до крајот на 2009 година.
Предлог планот за работа до крајот на 2009 година, кој претходно беше доставен до сите алпинисти, беше оценет како ‘‘пренабиен‘‘, така да предвидената динамика на активности ќе биде тешко да се оствари. Договорено е да се направи раздвојување на активностите кои се однесуваат на обуката на почетниците во однос на класичните собири каде што акцентот е ставен главно на качувањето по избор.
Инструкторите и кандидатите за инструктори ќе се распоредат за учество во собирите кои се наменети за почетници. Курсеви за апсолутни почетници нема да се организираат на ниво на МАА. До крајот на годината вакви активности ќе се одвиваат во рамките на клубовите.

Со оглед на тоа што планираната акција во Алпи не се одржа заради тоа што не беа обезбедени средства, решено е во текот на Октомври да се реализира акција во Пакленица, Република Хрватска. Според првичниот план, во Хрватска треба да заминеме со три возила, меѓутоа целата акција зависи од средствата кои Агенцијата за млади и спорт на Р.М. треба да ни ги префрли за оваа година (МАА, т.е. алпинзмот, оваа година нема добиено ниту денар од Агенцијата). Учеството во акцијата ќе се обезбеди преку отворен конкурс за сите редовни членови на МАА.

Во текот на месец Ноември ќе се одржи меѓународен алпинистички собир во Демир Капија. Дополнително ќе биде утврдено дали собирот ќе има одреден тематски карактер.

На почетокот на месец Декември ќе се одржат алпинистичките испити за инструктори, алпинисти и помлади алпинисти.

2. Донесување план за уредување на алпинистичките локалитети.
До крајот на ова година ќе се уредуваат следниве алпинистички локалитети:

Солунска Глава - ќе се постави уште една линија за абзелување до подножјето на карпата и ќе се направи обид за качување и средување на една нова насока. Овие активности се планирани за претстојниот викенд, се разбира доколку тоа го дозволат временските прилики.

Демир Капија - ќе се направат извесни интервенции на патеката за приод до карпата.

Матка - чистење и репозиција на осигурувањето во насоките.

До крајот на оваа година членовите на АК ‘‘Астрајон‘‘ од Штип ќе работат и во локалитетот Раткова Скала, но со оглед на обемноста на работите (голема карпа која досега не е искачувана), за оваа година не се очекуваат поконкретни резултати во правец на нејзина јавна промоција.

3. Планирање на наредните активности во правец на промоција и популаризација на алпинизмот.
Серијата изложби на фотографии од Аце Дончев направени за време на минатогодишната акција во Алпи, ќе продолжи. Во текот на месец Октомври ќе има изложба во Скопје, во почетокот на Ноември изложбата ќе биде поставена во Штип, а за во Радовиш и Струмица термините ќе бидат дополнително дефинирани.
Покрај тоа договорени се и неколку трибини и јавни презентации во јавноста и во медиумите. Деталниот распоред ќе биде дополнително објавен.

4. Дефинирање на организациската поставеност на МАА и започнување процес за обука на алпинисти според IFMGA стандардот за професионални алпинистички водачи.
Потврден е ставот за организациската поставеност на алпинизмот како државна спортска федерација, согласно со Законот за спорт (толкуван од експерти кои се занимаваат со законодавно креирање). Здружувањето со другите планинарски спортови во поширок сојуз (сегашната ФПСМ) е цврста определба на МАА и во заеднички интерес на сите планинарски спортови. Евентуалните (вештачки инсталирани) пречки ќе ги решаваме од ситуација во ситуација, согласно со потребниот обем и вид на активности што ќе треба да се превземат.

На состанокот е донесена одлука да се започне со процесот за обука на алпинисти според меѓународниот IFMGA алпинистички стандард за професионални водачи. Во текот на месец Октомври ќе бидат објавени критериумите и нормите за обука, после што ќе биде објавен и конкурс за пријавување на заинтерсирани алпинисти. Во текот на идната пролет ќе донесеме одлука за тоа која земја - организација на водачи ќе биде наш ментор при овој процес. Инаку за информација, обуката за алпинистички водачи според IFMGA стандардот трае најмалку три години, а алпинистичките критериуми се доста високи.

5. Разно
Под оваа точка беше разгледано недоразбирањето што настана со алпинистот Игор Талевски во врска со ставањето во функција на привремениот назив на веб страната на МАА.
Беше донесена одлука да се забрза спроведувањето на одлуката на Претседателството на МАА од Мај оваа година, кога беше решено да се смени изгледот и називот на веб страната на асоцијацијата, но се чекаше на конечно решавање на организацискиот статус. Новата адреса ќе биде www.macf.mk  и таа ќе биде ставена во функција најбрзо што може.
Недоразбирањето со alpinizam.org ќе го решиме внатре во алпинистичката организација и понастрана од ‘‘јавни дебати‘‘, бидејки станува збор за наши пријатели и колеги,  а македонскиот алпинизам има капацитет за сериозно и институционално функционирање. Во изминативе години успеавме да поставиме квалитетен систем за организациско функционирање на алпинизмот, обучивме сериозен број на нови и млади луѓе, и сега треба да почнеме да работиме на реализација на комплексни програми за врвен алпинизам, па затоа нема место за конфликти помеѓу алпинистите и непотребно трошење енергија.

 

Алпинистички локалитет Плоча
21 Септември 2009 година

Македонска Алпиниситчка Асоцијација
Претседател: Костантин Циривири

 

УРЕДУВАЊЕ ВО ЛОКАЛИТЕТОТ МАТКА

Прочистена пристапната патека од браната кон Манастирот Свети Никола и кастрење на ‘‘Новогодишен‘‘.

По многу одложувања акцијата за средување на алпинистичкиот локалитет Матка конечно започна. На 6 Септември Ико (Илија Циривири - АК ‘‘Матка‘‘) ја прочисти патеката што води од браната до Манастирот. За жал пред два дена кога се враќавме од качување по оваа патека забележавме дека некои (најверојатно козарите) исекле нови гранки и ги исфрлиле на патот. Колку можевме во мракот расчистивме, а апелираме и до сите кои ќе минуваат по патеката да ги подзачистуваат гранките кои се на патот.

Инаку Ико се зафати да го чисти и ‘‘Новогодишен‘‘, па првата фаза ја заврши со кастрење на ‘‘вишокот‘‘ гранки и вегетацијата од насоката. Со оглед на тоа што било Недела - викенд ден, бил многу внимателен со чистењето на нестабилните делови од карпата, но си постави за цел да го заврши започнатото во најскоро време.

Чистењето на насоките на Матка и обновување на клиновите ќе продолжи во наредниот период, со тоа што главниот акцент заради повеќе објективни причини ќе биде ставен во месец Ноември.

Сите постапки што ќе се превземаат во алпинистичките насоки на Матка ќе бидат во склад со декларацијата на UIAA за уредување на алпинистичките локалитети.

 

Костантин Циривири
Македонска Алпинистичка Асоцијација

 

Собирот на Плоча се поместува за 20 и 21 Септември 2009 (недела и понеделник)

Алпинистички Собир 20-21 Септември 2009 локалитет Плоча.
14.09.2009

 

Во деновите од наредниот викенд во алпинистичкиот локалитет Плоча ќе се одржи алпинистички собир кој ќе биде од едукативно - тренажен карактер. Во продолжение следува преглед на програмата за работа.

 

Програма за работа

 

Тематска содржина.
На собирот ќе се работат три тематски содржини. Тие се:
- Качување по избор;
- Работа со учесниците во алпинистичкото училиште на МАА;
- Критериуми, мерки и постапки за безбедност во алпинизмот;

 

Програма за работа за ден 20 Септември 2009 година
Тема: Работа со учесниците во алпинистичкото училиште.
На 20 Септември ќе се изведува програма за работа во рамките на алпинистичкото училиште на МАА и истата е задолжителна за сите посетители на алпинистичкото училиште.
Работните содржини кои ќе се изведуваат во Сабота се продолжение на активностите од претходните семинари на училиштето, а во текот на наредните денови, раководителот на семинарот Зоран Мајсторски, ќе достави план за работа.

Програма за работа за ден 21 Септември 2009 година
Тема: Критериуми, мерки и постапки за безбедност во алпинизмот
Работните содржини кои ќе се изведуваат на 21 Септември - Недела, се задолжителни за сите членови на МАА. Без учество во овие работни содржини нема да може да се обнови алпинистичкиот назив во наредната година ниту пак да се учествува во акциите организирани од страна на МАА.
Во продолжение следува преглед на работните содржини.

 
Во периодот од 16.30ч до 18ч ќе се одржи состанок на Претседателството на Македонската алпинистичка асоцијација.

Дополнителни информации можат да се добијат:
02/ 3165 540 - канцеларија ФПСМ (Костантин Циривири)
071/ 369 280 - Претседател на МАА
070/ 550 058 - Раководител на семинарот за алпинистичкото училиште (Зоки Мајсторски).

 

Скопје, 14.09.2009 година

Македонска Алпинистичка Асоцијација
Претседател: Костантин Циривири

---

Љубовџии - првенствена насока на Матка.
Август

Доколку текстов добие функција на извештај навистина би било неморално, неетички и срамота башка. Бидејќи, секако сакам да оставам позитивен впечаток сега ке си раскажам како изгледаше отприлика едно возбудливо искачување на првенствена насока, со име исто како насловот - Љубовџии.

Доколку се сеќавате на текстот за насоката именувана по еден амерички писател најверојатно го памтите и делот кога со Круно се исплашивме да влеземе во една пукнатина над првото сидриште. Се сеќавате? Добро е, како и да е, токму таа пукнатина не инспирираше да влеземе во нова првенствена. Првиот пат кога висевме под неа со страв си ветивме дека откога ќе направиме “некое склекче”, ќе исцртаме и нова линија на фотографијата во Фотошоп и ќе ја претставиме како нашата нова првенствена. Минаа неколку (чинам две) непреспиени ноки и во еден здив, олеснително со Круно решивме дека ќе ја качуваме. За да не биде дека не стоиме на зборот утрото кога рано-рано уште во 7 часот бевме под карпата и навистина направивме некое склекче.

Првиот цуг го водев јас, истиот од насоката “Буковски”, а Круно го имаше задоволството да протнува френдови и кова клинови во фамозната пукнатина. Целата пукнатина се протега низ еден доста компактен дел за како бургија те изврти до терасата на нејзиниот завршеток. Колку што беше целата пукнатина и се околу нејзе цврсто толку беа растурени блоковите на терасата. Некако Круно се снајде и направи некое сидриште. Бидејќи Круно ја имаше можноста да ги поставува френдовите и убаво да ги заглави, јас ја имав таа чест да висам на една рака и во најнезгодната торзија за едно човечко тело, да ги вадам истите. Нема да останам рамнодушен и да не се осврнам на моментот кога после многуте френдови Круно почна да кова една кајла со амбиција на декоратор во ликовно студио и надеж да ја покрие цела Матка. Како што отпејуваше клинот така нас ни се растегнуваше се поголема и поголема насмевка на нашите лица се додека почнавме во лицата да наликуваме на булдогот од цртаниот филм со “Том и Џери”. После дознавме дека клинот и не е баш толку цврст колку што мислевме дека е.
Нејсе, од терасата се извиваше уште една пукнатина и нормално јас сакав да ја водам. И ја водев. Иако имаше огромни пропорции пукнатината можев да заглавувам само мали френдчиња, добро и на две места ставив френд четворка, односно петка. За разлика од малите френдови пукнатината примаше големи чокови. Тегнејќи се по пукнатината стигнав на место каде што повторно со издишка на ранета срна и олеснително чувство растегнував насмевка на одѕвонувањето на мојата РИС жилетка. Се поткачив уште малку и направив сидриште на кое што планиравме да качиме и шанк со убава и згодна шанкерка таму горе - бевме жедни и сакавме да и дадеме романтичен шмек на нашата жед. Качивме уште малку и најбрзо што можевме итавме удолу кон останата вода.

Во жештината се вративме дома среќни дека сега ќе може да спиеме на раат без да не измачуваат соништа околу неискачени пукнатини, барем во тој дел, од таа карпа, во овој свет - за другите светови не знаеме какви карпи имаат. Имено нашата насока има оценка 6+, за нејзино искачување поребни си околу 5-6 мали фреnдови - до тројка. Имаме оставено некоколку клинови и абзел-линија. Попладнето мојот другар, а на Круно брат, Аџи, не прошета до Охрид каде што упаднавме ПОЛИЦИСКИ на состанок на алпинистичкиот клуб Апекс. Вечерта ја завршивме пиејќи пиво со алпинистите од Апекс, а утрото го почнавме возејќи се накај дома.

Илија Циривири

П.С. Зошто насоката се вика Љубовџии? Не знам прашајте го Ристе зошто така не вика мене и Круно!

---

Нова насока на Плоча - ROCK PILLAR.
14.08.2009

Скоро секој пат качувајќи некоја насока инстинктивно разгледувам лево идесно каде што има можност јас да качам некоја логична линија од која подоцна би произлегла нова насока, така да по многу качувања на насоката Ракета од левата страна забележав некоја логика за нова линија и потајно ја анализирав без некому да му кажам за мојот иден проект. Тајноста ја чував се до моментот кога решив да ја реализирам и да му кажам на мојот млад партнер Гоце Јовановски па заедно да ја поминеме.
Петок 14 август од Радовиш тргнавме со такси до Плоча иако беше 16 часот сепак ние бевме решени да ја качеме нашата линија. Под карпата набрзина ја подготвивме опремата која се состоеше од 7 клинови, 6 френда, 4 мали и 3 големи чокови, 6 гуртни, 5 комплети и останата лична опрема.
Часот беше точно 17 кога влегов да качувам, како почнав да ги искачувам првите движење полека доаѓав до местата што отприлика ми беа забележани каде да ги поставам осигурителните точки, но кога доаѓав до нив увидував дека не се најпрактични и небезбедни поради ронливост. Првата пукнатина која ми беше планирана за големиот френд многу ме исплаши поради нестабилноста на блокот кој е со поголема димензија па го поминав од страна за погоре да поставам мало чокче во пукнатина која ветуваше многу повеке.

Тежината на насоката и не беше некоја голема но нестабилните блокови, мовта која ја имаше во изобилие и тревата која беше обрасната на места каде што ми беа потребни да фатам или стапнам мораше отпрвин да ги исчистам или да ископам со шилецот на кладивото. За осигурување добредојдено ми беше и дрвото кое се наогаше мегу искршени блокови. Сидриштето го направив на големото дрво на првата тераса 5 метри во лево од насоката Ракета, должината на цугот беше нешто повеке од 25 метри.
Откако Гоце тргна негова цел беше да извади се што имав оставено по насоката па така и тој полека но сигурно се движеше нагоре без никаков проблем само негова цел беше да ги бутне лабавите камени блокови. Кога беше близу до мене ги осетивме капките од дожд од облаците кои цело време вртеа околу нас, додека Гоце качуваше го следев дождот како доагаше кон нас но за срека не заврна, стаса само на 200 метри воздушна ллинија до нас, а ние го слушавме треперењето на лисјата на дрвата.
Второто јаже нагоре изгледаше многу почисто од треви и беше покомпактно и вистински беше така. Најпрво тргнав кон мал превис кој имаше доста фаќалишта и лесно го поминав. Откако излегов се мислев да одам во лево или во десно но некако во лево ми изгледаше поубаво и поразиграноно само што имаше многу повеке мов која веќе ја игнорирав. Стапка по стапка се качував и рагледував места за осигурување. Пред да излезам на терасата отидов во десно до местото за сидриште кое се наогаше само на неколку метри од сидриштето на Ракетата.

Гоце исто така беше задоволен од квалитетот на карпата и овде си ја знаше функцијата да извади се што имам поставено. Откако дојде до сидриштето ги соблече старо - новите патики за качување кои ни беа донација од Германија со кој пробно качуваше. Од сидриштето го наблудувавме превисот кој не нудеше некоја добра можност и кој не беше баш така лесен.

Прво што беше заковав жилетка повисоко во превисот, полека виснав и се ослободив, видов дека е добро поставена и после заковав уште еден клин кој добро влезе и не се секирав многу зошто знаев дека сигурно ќе го издржи мојот пад. Се мачев и поткачив погоре увидов дека можам да ставам френд во пунатина но не ја видов туку само ја чуствував со врвотите на прстите но подоцна кога со мака дојдов до неа видов дека пуканатината е во V формација кон надвор, веднаш барав нова варијанта. Гоце ми укажа на една пукнатина за држење која беше десно од мене и ме дебалансираше но кога ја видов беше како створена за френд. Го ставив френдот го тестирав се подигнав еднаш и кога го олабавив тој се помрдна и на наредното оптоварување се откачи и летнав надолу, но за срека само околу еден метар. Ме задржа жилетката па поради тоа Гоце ја остави да стои како спомен. Пробав да го качам превисот уште еднаш но овојпат употребив многу сила, погоре дофатив добро факалиште, во лево фатив уште едно но нозете ми лизнаа поради мовта и останав да висам само на раце, но силата не ме напушти и успеав да се задржам се наместив и полека излегов нагоре но на самиот излез на Гоце му викав да не го затегнува јажето, стоев во лоша згрчена положба, а телото почна да ми се тресе. Одеднаш ме фати паника зошто немаше многу можности каде да се фатам, а ако паднев ке беше на тераса под мене и можеше да биде многу лошо.

Полека ги дофакав малите структури на карпите за да добијам добар баланс, а и френдот ми беше во устата кој требаше да го поставам подолу. Челото ми беше облеано со пот но некако се стабилизирав и застанав на стабилно место дишев длабоко и во тој момент станав многу религиозен па прво што си реков беше “Фала ти господе”. Имав широка пукнатина ставив френд но не ми ветуваше многу па заковав и клин. Нагоре се движев задишан и ми требаше многу време за да се стабилизирам но се движев по легнатиот дел од карпата и одев таму каде што посакував за на крај да излезам некаде во највисокиот дел од карпата на висина на крстот кој сега го нема но за потребите на крстот ставивме експанзионен клин и тој ми послужи како точка за сидриштето. Секако додадов и мои точки па така организирав добро сидриште.
Гоце тргна нагоре но имаше проблем. Проба еднаш, се откажа, проба втор пат повторно се откажа, но на третиот пат направи прусик за самоизвлекување и го мина превисот. Ова јаже беше со должина од околу 45 метри. Кога дојде до мене веке беше стемнето. Насоката ја качивме за 2 часа и 45 минути. Слеговме до под карпа ја спремивме опремата и заминавме за Радовиш со авто-стоп.

Зоран Мајсторски
АК Плоча - Радовиш